ପହିଲି ରଜରେ ଆସିଲା ଓଡ଼ିଆ ଫିଲ୍ମ ‘ଆଇଲଭୟୁ-୨’ର ଫାଷ୍ଟ ସୋକେଶ୍

ଭୁବନେଶ୍ବର,୧୪/୬ : ଓଡ଼ିଆ ସିନେ ପ୍ରେମୀଙ୍କ ପାଇଁ ଖୁସି ଖବର । ପହିଲି ରଜରେ ସାମ୍ନାକୁ ଆସିଲା ଓଡ଼ିଆ ଫିଲ୍ମ ‘ଆଇଲଭୟୁ-୨’ର ଫାଷ୍ଟ ସୋକେଶ୍ । ‘ଆଇଲଭୟୁ-୨’କୁ ନେଇ ଦର୍ଶକଙ୍କ ମଧ୍ୟରେ ବେଶ ଉତ୍ସାହ ଦେଖାଦେଇଛି । ‘ଆଇଲଭୟୁ-୨’ ୨୦୦୪ରେ ରିଲିଜ ହୋଇଥିବା ଓଡ଼ିଆ ଫିଲ୍ମ ‘ଆଇଲଭୟୁ’ର ସିକ୍ବେଲ । ‘ଆଇଲଭୟୁ’ ଓଡ଼ିଆ ଫିଲ୍ମ ଇତିହାସର ଏକ ବ୍ଲକ ବଷ୍ଟର ଫିଲ୍ମ ଭାବେ ସବୁବେଳେ ଗଣା ହୋଇଥାଏ । ଆଜି ବି ହଲରେ ପଡ଼ିଲେ ହାଉସଫୁଲ୍ ହେବାକୁ ନଜିର ରହିଛି ।ବସନ୍ତ ନାୟକ ଏଣ୍ଟରଟେନମେଣ୍ଟ ବ୍ୟାନରରେ ନିର୍ମିତ ହୋଇଛି ‘ଆଇଲଭୟୁ ୨’ । ପ୍ରଯୋଜନାରେ ସଞ୍ଜୟ ନାୟକ(ଟୁଟୁ) ଥିବାବେଳେ କାର୍ଯ୍ୟନିର୍ବାହୀ ପ୍ରଯୋଜକ ଭାବେ କ୍ରିଷ୍ଣା ପ୍ରୟାଗ ନାୟକ(ପ୍ରେମ) ରହିଛନ୍ତି । ନିର୍ଦ୍ଦେଶନା ଭାର ନିଭାଇଛନ୍ତି ସୁଧାଂଶୁ ମୋହନ ସାହୁ, ସଂଳାପ ଏବଂ ଚିତ୍ରନାଟ୍ୟ ଦାୟିତ୍ବରେ ଅଛନ୍ତି ପ୍ରିୟବ୍ରତ ପଣ୍ଡା । ସେହିଭଳି ଡିଓପିରେ ଦୀପକ କୁମାର ଘଡ଼ାଇ ଅଛନ୍ତି । ଏହି ଫିଲ୍ମ ବିଶେଷ କରି କଟକ, ଭୁବନେଶ୍ବର ଏବଂ ଜମ୍ମୁ –କଶ୍ମୀର, ଶ୍ରୀନଗର, ଡାଲ୍ ହ୍ରଦ ଭଳି ଲୋକେସନରେ ସୁଟିଂ ହୋଇଛି । ସଂଗୀତରେ ପ୍ରେମ ଆନନ୍ଦ ଥିବାବେଳେ ହ୍ୟୁମାନ ସାଗର, ଦିପ୍ତୀରେଖା ପାଢୀ, କୁଲଦୀପ ପଟ୍ଟନାୟକ, ଶଶାଙ୍କଶେଖର ଓ ସତ୍ୟଜୀତ ପ୍ରଧାନ ପ୍ରମୁଖ ସ୍ବରରେ ଅଛନ୍ତି । ଅଭିନୟରେ ନବାଗତ ଆଦିତ୍ୟ ରହିଛନ୍ତି । ଅନ୍ୟ ଷ୍ଟାରକାଷ୍ଟ କେଉଁମାନେ ଅଛନ୍ତି ତାହା ଏବେ ସମ୍ନାକୁ ଆସି ନାହିଁ । ଖୁବଶୀଘ୍ର ତାହା ଘୋଷଣା କରାଯିବ ବୋଲି ପ୍ରଯୋଜନା ସଂସ୍ଥା ପକ୍ଷରୁ କୁହାଯାଇଛି । ଏହାସହ ଓଡିଶାର ଗଣପର୍ବରେ ଏହା ଓଡିଶାବାସୀଙ୍କୁ ଏକ ଭେଟି ବୋଲି କହିଛନ୍ତି ପ୍ରଯୋଜକ ସଞ୍ଜୟ ନାୟକ । ଏହାର ରିଲିଜ୍ ଡେଟ୍ କଥା ଯଦି ଆମେ କହିବା ତେବେ ଆସନ୍ତା ଗଣେଷ ପୂଜାରେ ଏହା ଫ୍ଲୋରକୁ ଆସିବ ବୋଲି ଜଣାପଡ଼ିଛି । ଦର୍ଶକମାନେ ଏହାକୁ ଦେଖିବାକୁ ବହୁ ଉତ୍କଣ୍ଠାର ସହ ଅପେକ୍ଷା କରିଛନ୍ତି ।